"Қолыңды бер, достым!" Көрісу күні құтты болсын!!!

Көрісу күні – қазақ халқының көктемді қарсы алатын, адамдар бір-бірімен қауышып, амандық-саулық сұрасатын ерекше дәстүрлі мерекесі. Ол жыл сайын 14 наурызда атап өтіледі және Наурыз мейрамы алдындағы маңызды күндердің бірі болып саналады.

Бұл күні адамдар ерте тұрып, туыстарын, көршілерін, достарын аралап, «Бір жасыңмен!», «Жасың құтты болсын!» деп бір-біріне жылы тілектер айтады. Ұзақ уақыт көріспеген жандар қол алысып, құшақтасып, өкпе-реніштерін ұмытып, татуласады. Сондықтан бұл күн – бірлік пен татулықтың, сыйластықтың белгісі.

Көрісу күні әсіресе Батыс Қазақстан өңірінде кеңінен тойланады. Бұл дәстүр адамдар арасындағы қарым-қатынасты нығайтып, үлкенге құрмет, кішіге ізет көрсетуге тәрбиелейді.

Қорыта айтқанда, Көрісу күні – адамдарды жақындастыратын, мейірімділік пен ізгілікті насихаттайтын ұлттық құндылықтарға толы ерекше мереке.